मुख्यमन्त्री कप राष्ट्रिय महिला भलिबल प्रतियोगिता २०८१ दमकमा सुरू
दमक, फागुन ११ – कोशी प्रदेश स्तरीय “मुख्यमन्त्री कप राष्ट्रिय महिला भलिबल प्रतियोगिता २०८१” को उद्घाटन समारोह आज दमकस्थित हिमालय माध्यमिक विद्यालयको मैदानमा सम्पन्न भएको छ। प्रतियोगिता नेपाल खेलकुद महासंघ कोशी प्रदेश कमिटीको आयोजनामा तथा कोशी प्रदेश खेलकुद विकास बोर्डको संयोजनमा सञ्चालन भइरहेको छ।
उद्घाटन समारोहका प्रमुख अतिथि कोशी प्रदेशका माननीय मुख्यमन्त्री हिक्मत कुमार कार्की रहनुभएको थियो। विशिष्ट अतिथिका रूपमा कोशी प्रदेश खेलकुद विकास बोर्डका सदस्य सचिव कृष्ण बस्नेत (पर्शुराम), नेकपा एमाले कोशी प्रदेश कमिटी अध्यक्ष घनश्याम खतिवडा, खेलकुद विकास बोर्ड सदस्य थलु राजभण्डारी लगायत विभिन्न खेल संघसंस्थाका व्यक्तित्वहरू, जनप्रतिनिधिहरू, राजनीतिक दलका प्रतिनिधिहरू तथा खेलप्रेमीहरूको उल्लेखनीय उपस्थिति रहेको थियो।
कार्यक्रमका अवसरमा मुख्यमन्त्री कार्कीले खेलकुद क्षेत्रको विकासले समाजमा सकारात्मक परिवर्तन ल्याउने भन्दै महिला खेलाडीहरूको आत्मविश्वास अभिवृद्धि गर्न यस्ता प्रतियोगिताहरू आवश्यक रहेको बताउनुभयो। अन्य वक्ताहरूले पनि खेलकुदको महत्त्व उजागर गर्दै प्रतियोगितामा सहभागी खेलाडीहरूलाई शुभकामना प्रदान गरे।
मुख्यमन्त्री कप महिला भलिबल प्रतियोगितामा विभिन्न टोलीहरू सहभागी छन्, जसले राष्ट्रिय स्तरमा आफ्नो प्रतिभा देखाउने अवसर प्राप्त गर्नेछन्। प्रतियोगिता सफलतापूर्वक सम्पन्न गर्न आयोजक तथा खेलाडीहरूलाई शुभकामना व्यक्त गरिएको छ।
