राजकुमार ओली।
बिर्तामोड, वैशाख १२ —
झापा जिल्ला सहकारी संघको सचिव पदका लागि दुई सक्षम र अनुभवी व्यक्तित्वबीच प्रतिस्पर्धा चर्किएको छ। दीर्घ अनुभव बोकेका भवानीप्रसाद दंगाल (भानु) र नवीन सोचका साथ अघि बढेका युवराज गिरिले आ–आफ्नो कार्ययोजना प्रस्तुत गर्दै निर्वाचनमा उत्रिएका छन्।
—
भवानीप्रसाद दंगाल (भानु) : दीर्घ सहकारी अनुभव र सुदृढ नेतृत्व
सहकारी आन्दोलनसँग २०६५ सालदेखि सक्रिय भवानीप्रसाद दंगाल झापाको सहकारी क्षेत्रमा एक परिचित र अनुभवी अनुहार हुन्।
उनले कर्णाली साकोस बिर्तामोडको सचिव भएर काम गर्दै नेतृत्व कौशल देखाइसकेका छन् भने २०६९ यता हाम्रो नेपाल साकोसको सशक्त नेतृत्व सम्हालेका छन्।
झापा जिल्ला सहकारी संघमा सह–सचिव र पछि संघकै सचिव भएर उनले संगठनात्मक विकासमा महत्वपूर्ण योगदान पुर्याएका छन्।
उनका प्रमुख योगदानहरू :
झापा जिल्लाका सहकारी संस्थाहरूको गुणस्तरीय सुधारमा नेतृत्व
सहकारी सिद्धान्त र मूल्यको संरक्षण र प्रवर्द्धन
सहकारी संघ र संस्थालाई वित्तीय र संस्थागत रूपमा सुदृढ बनाउने अभियान
सहकारी संकटमोचन र सुधार अभियानमा उल्लेखनीय भूमिका
अहिले सचिव पदमा पुनः उम्मेदवारी दिएका दंगालले आगामी कार्यकालमा सुदृढ, पारदर्शी र व्यवसायिक संघ निर्माण गर्ने ६ बुँदे कार्ययोजना सार्वजनिक गरेका छन्।
—
युवराज गिरि : स्वतन्त्र उम्मेदवारी र पारदर्शितामै आधारित नवीन सोच
सहकारी आन्दोलनमा स्वतन्त्र धारणा र पारदर्शी कार्यशैली लिएर अघि बढ्न चाहने उम्मेदवार हुन् युवराज गिरि।
उहाँले सहकारी संस्थाहरूमा सुशासन, पारदर्शिता र सदस्यहरूको प्रत्यक्ष सहभागिता बढाउन विशेष जोड दिएका छन्।
गिरिले संस्थागत विकास मात्र होइन, सहकारी संघलाई सदस्यमैत्री र जवाफदेही बनाउने लक्ष्य अघि सारेका छन्।
उनले लोकतान्त्रिक अभ्यासलाई मजबुत गर्दै आर्थिक पारदर्शिता र सहकार्य संस्कृति विकास गर्न सकिने धारणा व्यक्त गरेका छन्।
गिरिको योगदान र दृष्टिकोण :
सहकारीमा कार्यपद्धतिमा सुधार र नवीन अभ्यासको सुरुआत
सदस्यहरूको आर्थिक सुरक्षालाई उच्च प्राथमिकता
संघभित्र सुशासन र जवाफदेही प्रणालीको विकास
सहकारी संस्थाहरूमा नयाँ पुस्तालाई आकर्षित गर्ने प्रयास
—
सहकारी आन्दोलनमा अनुभव र नवीनताको संगम
दुवै उम्मेदवारले आ–आफ्नो कोणबाट सहकारी आन्दोलनलाई सशक्त बनाउने अठोट व्यक्त गरेका छन्।
एकातिर दंगालले लामो अनुभव र संगठनात्मक विकासका उदाहरण प्रस्तुत गरेका छन् भने अर्कातिर गिरिले नयाँ सोच र पारदर्शी नेतृत्वको आवश्यकता औंल्याएका छन्।
सचिव पदका लागि यी दुई उम्मेदवारबीचको प्रतिस्पर्धाले झापा जिल्ला सहकारी संघमा नयाँ युगको ढोका खोल्ने अपेक्षा गरिएको छ।
भानु दङ्गाललाई नेकपा एमाले निकटको सहकारी टिम र नेपाली कांग्रेस निकटको साथै माओवादी केन्द्र को सहकारी टिमको साथ र समर्थन छ भने युवराज गिरीलाई स्वतन्त्र र अन्य पक्षको साथ र समर्थन देखिएको छ।
अब संघका सदस्यहरूले अनुभव र नवप्रवर्तनको सन्तुलित छनोट गर्नुपर्ने छ।
