राजकुमार ओली। बिर्तामोड,वैशाख १६ —
झापा जिल्लाको सुरक्षा व्यवस्थापनमा अब अनुभवी प्रहरी उपरीक्षक (एसपी) राजन लिम्बुको कमान आउने भएको छ। प्रहरी मुख्यालयको ताजा निर्णयअनुसार लिम्बु जिल्ला प्रहरी कार्यालय झापामा सरुवा भएर आइपुगेका छन्।
लिम्बुले यसअघि इलाका प्रहरी कार्यालय दमकमा डिएसपीका रूपमा कार्यरत रहँदा, अपराध नियन्त्रण, सामाजिक सद्भाव, ट्राफिक व्यवस्थापन तथा जनउत्तरदायी सेवा प्रवाहमा उल्लेखनीय सफलता हासिल गरेका थिए। त्यस समयको सार्वजनिक सहयोग, सक्रिय गस्ती, लागू औषध नियन्त्रण र सामुदायिक पुलिसिङ अभियान अझै स्थानीयको स्मृतिमा ताजा छ।
‘कुनै पनि अपराधलाई सहनु होइन, व्यवस्थापन गर्नु हाम्रो धर्म हो’ भन्ने दृढ मान्यतासाथ काम गर्ने लिम्बु, प्रहरी संगठनभित्र कर्मठ र इमानदार अधिकृतका रूपमा परिचित हुनुहुन्छ।
उहाँको दमक कार्यकालमा:
- गस्ती बढाइ राति हुने चोरी डकैतीमा उल्लेखनीय गिरावट आएको थियो।
- विद्यालय, क्लव र संघसंस्थासँग सहकार्य गर्दै लागू औषधविरुद्ध सचेतना अभियान सञ्चालन गरिएको थियो।
- महिला हिंसा, घरेलु हिंसा र साइबर अपराधमा पीडित–मैत्री पहलहरू गरिएको थियो।
- दमक उद्योग वाणिज्य संघ, विभिन्न समुदाय र सञ्चारकर्मीसँग खुला संवाद र सहकार्यमा आधारित प्रहरी कार्यशैली देखिएको थियो।
झापा—चोकदेखि सीमासम्म, अपराध नियन्त्रणदेखि बालसुरक्षासम्म
अब झापा जिल्लामा कार्यभार सम्हालेसँगै एसपी लिम्बुले सीमा क्षेत्रमा तस्करी नियन्त्रण, बालबालिका र महिलासँग सम्बन्धित अपराध रोकथाम, ट्राफिक अनुशासन सुधार तथा प्रहरी–नागरिक सम्बन्ध अझ प्रगाढ बनाउने योजना अगाडि बढाउने अपेक्षा गरिएको छ।
उहाँले पूर्व खबरसँग संक्षिप्त प्रतिक्रिया दिँदै भनेका छन्,
“समाजको विश्वास जित्ने प्रहरी बनौं। जनताको सुरक्षाका लागि कठोर तर न्यायसंगत कार्यशैली अपनाउँछु।”
एसपी लिम्बुको नेतृत्वमा झापाको सुरक्षा प्रणाली अझ व्यवस्थित, जनमुखी र पारदर्शी हुनेमा नागरिकस्तरबाट उच्च आशा गरिएको छ।
पछिल्लो समय झापा लागू औषध , दुर्व्यसनी अपराध तथा विभिन्न घटनामा निकै बदनाम बन्दै गएको छ।
खुला सिमानाको कारण पनि झापा जिल्ला नेपालकै संवेदनशील र व्यापार व्यवसायमा समेत उत्कृष्ट जिल्लामा परेको छ भने यहाँबाट तेस्रो मुलुकहरू भुटान बङ्गलादेश सहितका देशहरूमा अन्तर्राष्ट्रिय व्यवसायमा समेत अग्रणी जिल्ला मानिन्छ
नेपालको सबै किसिमका महत्वपूर्ण कामहरूमा झापाको आफ्नै पहिचान रहने गरेको देखिएको छ भने नेपालका मुख्य दलहरूका प्रमुख व्यक्तिहरू समेत झापा जिल्लाका नै भएकोले पनि झापा जिल्ला नेपाल मात्र होइन अन्तर्राष्ट्रिय स्तरमा समेत विभिन्न किसिमले चर्चामा रहने देखिएको छ।
