राजकुमार ओली, २ साउन : पूर्व खबर
झापा जिल्लाको बिर्तामोड नगरपालिकाबाट हालसम्मकै ठूलो परिमाणको लागू औषध बरामद गरिएको छ । औषधि व्यवसायी भानुभक्त खरेलको स्वामित्वमा रहेको भनिएको लागू औषधसहित प्रहरीले एक जनालाई पक्राउ गरेको छ भने खरेल फरार छन् ।
इलाका प्रहरी कार्यालय अनारमनीले बिर्तामोड–५, मंगलदीप टोलस्थित मनकुमार संग्रौलाको घरमा भाडामा लिइएको दुई वटा कोठाबाट प्रतिबन्धित लागू औषध बरामद गरेको हो ।
प्रहरीले शुक्रबार पत्रकार सम्मेलन गरी लागू औषधसहित पक्राउ परेका व्यक्तिको विवरण सार्वजनिक गरेको हो । पक्राउ परेका व्यक्ति अर्जुनधारा नगरपालिका–६, दासपुल निवासी २५ वर्षीय बिनोद घिमिरे रहेको प्रहरीले जनाएको छ । उनी फरार रहेका भानुभक्त खरेलको ‘सनलाइट फार्मा’मा काम गर्दै आएका थिए ।
घिमिरेको प्रयोगमा रहेको मोटरसाइकल (प्र.नं. १–०१–०१३ प ८९०४) समेत प्रहरीले बरामद गरेको छ ।
जिल्ला प्रहरी कार्यालय झापाका प्रहरी उपरीक्षक राजन लिम्बूका अनुसार लामो समयदेखि संग्रौलाको घर भाडामा लिएर दुई वटा कोठामा अवैध रूपमा लागू औषध भण्डारण हुँदै आएको प्रारम्भिक अनुसन्धानबाट खुलेको हो ।
प्रहरीका अनुसार बरामद गरिएका लागू औषधको विवरण यसप्रकार छः
- ट्रामाडोल हाइड्रोक्लोराइड ट्याब्लेट – १,०३,८०० थान
- ट्रामाडोल हाइड्रोक्लोराइड इंजेक्सन (ट्रामाडेक्स) – १,८७० एम्पुल
- ट्रामाडोल र एसिटामिनोफेन मिश्रित ट्याब्लेट – ४,०५० थान
- डाइसाइक्लोमाइन एचसीएल (२० एमजी) – ९७,००० थान
- सिल्डेनाफिल (जेनेग्रा एमटी रेड १००) – ८,९०० ट्याब्लेट
- मिफेप्रिस्टोन र मिसोप्रोस्टोल युक्त ‘टर्मिपिल किट’ – ७ प्याक
पत्रकार सम्मेलनमा इलाका प्रहरी कार्यालय अनारमनीका प्रहरी नायब उपरीक्षक विजय श्रेष्ठले पक्राउ, अनुसन्धान र बरामद भएको सामग्रीबारे जानकारी गराएका थिए ।
प्रहरीले फरार रहेका खरेलको खोजी तीव्र पारेको जनाएको छ । सो घटनालाई लिएर लागू औषध कारोबारमा संगठित संलग्नताको आशङ्का गरिएको छ ।