काठमाडौं, ९ कात्तिक प्रधानमन्त्री सुशीला कार्कीले राजधानीको पाँचतारे होटल ह्यात रिजेन्सीको सेवा बन्द र कर्मचारी प्रवेशमा गरिएको निषेधप्रति गम्भीर चासो व्यक्त गरेकी छन् ।
प्रधानमन्त्री कार्कीले देशकै पर्यटन तथा लगानी क्षेत्रसँग प्रत्यक्ष सम्बन्ध राख्ने ह्यात होटलजस्तो प्रतिष्ठानको बन्दले देशको छविमा नकारात्मक प्रभाव पर्न सक्ने बताउँदै तत्काल समस्या समाधानका लागि पहल थालेकी हुन् ।
प्रधानमन्त्रीको चासोपछि अर्थमन्त्री रामेश्वर खनालले ह्यात रिजेन्सी होटलको व्यवस्थापनसँग सम्पर्क गरी वर्तमान अवस्थाबारे जानकारी लिएका छन् । उनले सरकार पर्यटन व्यवसायीको सुरक्षाप्रति प्रतिबद्ध रहेको भन्दै व्यवस्थापनलाई उच्च मनोबलका साथ सेवा सञ्चालन गर्न आग्रह गरेका छन् ।
“तपाईंहरू आत्तिनु पर्दैन,” अर्थमन्त्री खनालले भने, “उच्च मनोबलका साथ आफ्नो सेवा सुचारु गर्नुहोस्, सरकार तपाईंहरूको सुरक्षाको पूर्ण जिम्मेवारी लिन्छ ।” उनले सुरक्षाको प्रभावकारी व्यवस्था मिलाएर होटल व्यवसाय निरन्तर सञ्चालन हुने वातावरण बनाइने बताए ।
ह्यात रिजेन्सी होटलले पछिल्ला केही दिनयता सुरक्षाजन्य कारण देखाउँदै सेवा अस्थायी रूपमा बन्द गरेको थियो । केही समूहले कर्मचारी प्रवेशमा अवरोध गर्दै होटलभित्र दबाब सिर्जना गरेपछि व्यवस्थापनले सेवामै रोक लगाएको थियो । होटलका एक वरिष्ठ अधिकृतका अनुसार, नियमित सेवाग्राहीका बुकिङ र अन्तर्राष्ट्रिय पाहुनाहरूको आगमन कार्यक्रम पनि स्थगित गरिएको छ ।
पर्यटन क्षेत्रका जानकारहरूका अनुसार, ह्यात होटलजस्तो अन्तर्राष्ट्रिय स्तरको प्रतिष्ठान बन्द हुँदा देशको पर्यटन र लगानी सन्देशमा नकारात्मक असर पर्ने सम्भावना रहन्छ । ह्यातमा वार्षिक रूपमा हजारौँ देशी तथा विदेशी पाहुनाहरू बसोबास गर्छन्, जसबाट करोडौँ राजस्व र सयौँ व्यक्तिको रोजगारी टेकेको छ । होटल बन्द हुँदा ती सबै प्रत्यक्ष र अप्रत्यक्ष रूपमा प्रभावित हुने स्थिति उत्पन्न भएको छ ।
नेपाल होटल व्यवसायी महासङ्घका प्रतिनिधिहरूले पनि ह्यात रिजेन्सीको स्थायित्व र सुरक्षाको वातावरण सुनिश्चित गर्न सरकारको तत्परता जरुरी रहेको बताएका छन् । उनीहरूका अनुसार, पछिल्ला केही घटनाले लगानीकर्ता समुदायमा असुरक्षाको भावना बढाएको छ, जसले दीर्घकालमा पर्यटन क्षेत्र कमजोर पार्ने खतरा छ ।
प्रधानमन्त्री कार्कीले होटल व्यवस्थापनसँग सरकारका तर्फबाट थप छलफल हुने र आवश्यक सुरक्षा तथा नीतिगत पहल तुरुन्त गरिने जनाएकी छन् । प्रधानमन्त्रीको सचिवालयका अनुसार, “सरकारले पर्यटन व्यवसायलाई राष्ट्रिय अर्थतन्त्रको मेरुदण्डका रूपमा लिएको छ । यस्तो अवस्थामा कुनै प्रतिष्ठान बन्द रहनु नीतिगत रूपमा अस्वीकार्य विषय हो ।”
सरकारको चासो र प्रतिबद्धतापछि होटल व्यवस्थापन पुनः सेवा सञ्चालनका तयारीमा लागेको बताइएको छ । परिस्थितिमा सुधार आएपछि ह्यात होटलले सेवा पुनः सुचारु गर्ने र पाहुनालाई नियमित रूपमा स्वागत गर्ने अपेक्षा गरिएको छ ।