बिर्तामोड,४ पुस (पूर्व खबर)
कोशी प्रदेशकै तेस्रो ठूलो सहकारीका रूपमा स्थापित कर्णाली बचत तथा ऋण सहकारी संस्था लिमिटेडले विधि, प्रक्रिया र पारदर्शितालाई प्राथमिकतामा राखेर सञ्चालन गरिएकै कारण संस्था सबल र अब्बल बनेको दाबी गरेको छ ।
संस्थाको २५औँ वार्षिक साधारण सभा तथा रजत महोत्सव समापन कार्यक्रममा अध्यक्ष टसबहादुर प्रधानले सो कुरा बताउनुभएको हो ।
शुक्रबार झापामा सम्पन्न साधारण सभाले एकीकृत माइन्युट प्रमाणीकरण गर्दै औपचारिक रूपमा २५औँ वार्षिक साधारण सभा सम्पन्न गरेको छ । पुष ४ गते संस्था दर्ता भएको मितिले २६औँ वर्षमा प्रवेश गरेकाले वार्षिक साधारण सभासँगै रजत महोत्सव पनि समापन गरिएको हो ।
अध्यक्ष प्रधानको अध्यक्षतामा आयोजित कार्यक्रमको पहिलो सत्रमा बोल्दै उहाँले इकाइगत साधारण सभाबाट छलफल गरी तयार पारिएका माइन्युटलाई एकीकृत गरेर प्रतिनिधिहरूमार्फत थप छलफल, सुझाव र काँटछाँटपछि प्रमाणीकरण गरिएको स्पष्ट पार्नुभयो । उहाँले सदस्य र प्रतिनिधिको सक्रिय सहभागिताले संस्थालाई अनुशासित र उत्तरदायी बनाएको उल्लेख गर्नुभयो ।
अध्यक्ष प्रधानले संस्था यहाँसम्म आइपुग्नुमा सेयर सदस्यहरूको निरन्तर खबरदारी, सुझाव र निगरानी निर्णायक रहेको बताउनुभयो । “सञ्चालक समिति विधि र प्रक्रियाबाटै चलिरहेको छ । यही कारणले कर्णाली साकोस आज सदस्यहरूको भरोसाको संस्था बन्न सफल भएको हो,” उहाँले भन्नुभयो ।
हाल सहकारी क्षेत्रसहित सम्पूर्ण बैंक तथा वित्तीय संस्थाले विभिन्न किसिमका बाह्य चुनौती सामना गरिरहेको सन्दर्भमा कर्णाली सहकारीले जोखिम व्यवस्थापन गर्दै अगाडि बढिरहेको अध्यक्ष प्रधानको भनाइ थियो । उहाँका अनुसार ऋण लगानी र असुलीको गति केही सुस्त देखिए पनि संस्थाले सतर्कतापूर्वक वित्तीय अनुशासन कायम गर्दै दीर्घकालीन स्थायित्वलाई प्राथमिकता दिएको छ ।
अध्यक्ष प्रधानले राज्यका नियमनकारी तथा अनुगमनकारी निकायको अनुगमनलाई स्वागत गर्ने स्पष्ट धारणा व्यक्त गर्नुभयो । “हामी अनुगमनबाट भाग्ने होइन, स्वागत गर्छौँ । गलत काम गरेका छैनौँ । यदि काम गर्ने क्रममा कुनै कमजोरी भए भने अनुगमनकारी निकायको सुझावअनुसार सुधार गर्न तयार छौँ,” उहाँले भन्नुभयो ।
संस्थाका संस्थापक (प्रारम्भिक) ज्येष्ठ सेयर सदस्य जयबहादुर गौतमले पानसमा दीप प्रज्वलन गरी कार्यक्रमको उद्घाटन गर्नुभएको थियो । कार्यक्रममा संस्थाका पूर्व अध्यक्ष महेन्द्रप्रसाद चुडाल, लेखा समितिका संयोजक मनकुमार बेघा, इकाइगत साधारण सभाबाट प्रतिनिधित्व गर्दै आएका बिमला गौतम भट्टराई र हरिराज भट्टराईले संस्थाको वर्तमान अवस्था, चुनौती र भावी दिशाबारे आफ्ना धारणा राख्नुभएको थियो ।
कार्यक्रमको सञ्चालन सचिव भूपाल बस्नेतले गर्नुभएको थियो भने उपाध्यक्ष रामकुमार गौतमले सहभागीहरूलाई शाब्दिक स्वागत गर्नुभएको थियो ।
साधारण सभाको दोस्रो सत्रमा संस्थाले सामाजिक उत्तरदायित्व अन्तर्गत विभिन्न रोगको उपचार गराइरहेका आफ्ना पाँच जना सदस्यलाई उपचार सुविधा प्रदान गरेको छ । संस्थाले कुल दुई लाख ८०० रुपैयाँ उपचार सहायता वितरण गरेको हो ।
भद्रपुर सेवा केन्द्रअन्तर्गतका सेयर सदस्य कल्पना सुब्बालाई ९८ हजार ५०० रुपैयाँ, कुन्ता चापागाईंलाई २१ हजार ६०० रुपैयाँ र बिर्तामोड कृषि थोकबजार सेवा केन्द्रकी सदस्य रञ्जिता लिम्बूलाई ३० हजार ५०० रुपैयाँ प्रदान गरिएको छ ।
त्यस्तै सैनिकमोड सेवा केन्द्रअन्तर्गतका सदस्य संगीता गुरुङलाई २५ हजार १०० रुपैयाँ र आशा चौधरीलाई १० हजार ८०० रुपैयाँ उपचार सुविधा प्रदान गरिएको विभागीय अधिकृत मनहरि निरौलाले जानकारी दिनुभयो ।
कोशी प्रदेशमै तेस्रो ठूलो सहकारीको पहिचान बनाइसकेको कर्णाली बचत तथा ऋण सहकारीले वित्तीय अनुशासन, सामाजिक उत्तरदायित्व र सदस्य केन्द्रित सेवाका माध्यमबाट आफ्नो विश्वसनीयता थप बलियो बनाउँदै लगेको सहभागीहरूको भनाइ थियो ।
