राजकुमार ओली बिर्तामोड झापा
प्रहरी उपरीक्षक (एसपी) मिलन केसीले झापा जिल्लामा आफ्नो कार्यकालमा उल्लेखनीय सफलता हासिल गरेका छन्।
तस्करी नियन्त्रण, फरार अभियुक्तहरूको पक्राउ, लागुऔषध विरुद्धको अभियान र शान्ति सुरक्षाको सुदृढीकरणमा उनले देखाएको नेतृत्व प्रशंसनीय छ।
तस्करी नियन्त्रणमा उल्लेखनीय सफलता
एसपी केसीको नेतृत्वमा झापा प्रहरीले आर्थिक वर्ष २०८०/८१ मा ५ करोड ७० लाख ४६ हजार ४८८ रुपैयाँ बराबरको तस्करीका सामान बरामद गरेको छ, जुन अघिल्लो वर्षको तुलनामा ४३.२० प्रतिशतले बढी हो। भारतसँग सीमा जोडिएका क्षेत्रहरूमा भन्सार चोरी र तस्करी नियन्त्रणमा उनले विशेष रणनीति अपनाएका छन् ।
फरार अभियुक्तहरूको पक्राउ
फैसला कार्यान्वयन अन्तर्गत फरार प्रतिवादीहरूलाई पक्राउ गर्ने अभियानमा पनि झापा प्रहरीले उल्लेखनीय प्रगति गरेको छ। आर्थिक वर्ष २०८०/८१ मा ४२७ जना फरार प्रतिवादी पक्राउ परेका छन्, जसबाट १८४ वर्ष १ महिना १३ दिन कैद र ५ करोड ४ लाख ९८ हजार १४३ रुपैयाँ जरिवाना असुल गरिएको छ ।
लागुऔषध विरुद्धको अभियान
झापा जिल्लामा लागुऔषधको कारोबार नियन्त्रणमा पनि एसपी केसीको नेतृत्वमा उल्लेखनीय सफलता हासिल गरिएको छ। आर्थिक वर्ष २०८०/८१ मा २९७ वटा लागुऔषध सम्बन्धी मुद्दा दर्ता भएका छन्, जसमा ४६२ जना पक्राउ परेका छन्। यस अवधिमा २ किलो १७४ ग्राम १९५ मिलिग्राम ब्राउनसुगर बरामद गरिएको छ ।
पुरस्कार र सम्मान
एसपी केसीको उत्कृष्ट कार्यसम्पादनको उच्च मूल्याङ्कन गर्दै कोशी प्रदेश प्रहरी कार्यालयले उनलाई नगद पुरस्कारसहित सम्मानित गरेको छ। उनले विभागीय मूल्य–मान्यता, आदेश–निर्देशनको पालना गरी व्यावसायिक, लगनशील र कर्तव्यनिष्ठ तवरले कर्तव्य पथमा तल्लीन रही उच्च मनोबल र साहसका साथ मौजदा कानुनको अक्षरस पालना गरी अपराध अनुसन्धान एवम् नियन्त्रणको क्षेत्रमा विशेष योगदान पुर्याएको जनाउँदै प्रदेश प्रहरी प्रमुख चन्द्रकुबेर खापुङले पुरस्कार प्रदान गरेका थिए ।
एसपी मिलन केसीको नेतृत्वमा झापा जिल्लामा शान्ति सुरक्षा कायम राख्न, अपराध नियन्त्रण गर्न र जनताको विश्वास जित्न उल्लेखनीय सफलता हासिल गरिएको छ। उनका यी प्रयासहरू आगामी दिनमा पनि प्रेरणादायी हुने विश्वास गरिएको छ।
