राजकुमार ओली,बिर्तामोड, ३ असोज (पूर्व खबर)
संविधान दिवसको अवसरमा शुक्रबार बिहान बिर्तामोडमा नेपाल पत्रकार महासङ्घ झापा शाखाको अगुवाइमा प्रभात फेरी कार्यक्रम सम्पन्न भएको छ। मानव अधिकार र लोकतान्त्रिक मूल्यलाई सबल पार्दै संविधान दिवसलाई सार्थक बनाउने उद्देश्यले गरिएको सो कार्यक्रममा राष्ट्रिय मानव अधिकार आयोग, नागरिक समाज, बिर्तामोड उद्योग वाणिज्य सङ्घ, मानव अधिकार एलायन्सलगायत करिब दुई दर्जन संस्थाहरूको सक्रिय सहभागिता रहेको थियो।
सहभागीहरूले बिहानै बिर्तामोड बजारको परिक्रमा गर्दै मानव अधिकार र लोकतान्त्रिक अभ्यासप्रति आफ्नो अटल प्रतिबद्धता जनाए। त्यसपछि मुक्ति चोकमा आयोजित कोणसभामा मानव अधिकारवादी, सञ्चारकर्मी र सामाजिक अगुवाहरूले संविधान दिवसलाई जनताको अधिकार र जिम्मेवारीसँग जोडेर मनाउनुपर्नेमा जोड दिएका थिए।
कोणसभामा सम्बोधन गर्दै मानव अधिकारवादी रूपक खनालले संविधान दिवस केवल औपचारिकताको दिन नभई नागरिक स्वतन्त्रता, समानता र न्यायलाई जीवन्त राख्ने अवसरको दिन भएको बताए। उनले भने, “आजको दिनले हामीलाई संविधानमा निहित अधिकारहरूको रक्षा गर्ने जिम्मेवारी दिलाउँछ। सञ्चारकर्मी र नागरिक समाजले निरन्तर सचेतना जगाउनुपर्ने आवश्यकता छ।”
त्यसैगरी नेपाल पत्रकार महासङ्घ कोशी प्रदेशकी उपाध्यक्ष अम्बिका भण्डारीले संविधान दिवसलाई प्रेस स्वतन्त्रता र लोकतान्त्रिक अभ्यासको दृढतासँग जोडेर व्याख्या गरिन्। उनका अनुसार पत्रकारितामाथि हुने दबाब र चुनौतीका बीचमा पनि सञ्चारकर्मीले सत्य र निष्पक्षता कायम राख्दै मानव अधिकार र लोकतान्त्रिक मूल्यको वकालत गर्नुपर्नेछ। उनले भनिन्, “संविधान दिवसमा हामीले स्वतन्त्र प्रेसलाई अझ सबल बनाउन संकल्प लिनुपर्छ, किनकि स्वतन्त्र प्रेस बिना लोकतन्त्र अपूर्ण हुन्छ।”
नेपाल पत्रकार महासङ्घ झापा शाखाका उपाध्यक्ष सुब्रत न्यौपानेले संविधान दिवसलाई सञ्चारकर्मीहरूले विशेष अर्थका साथ मनाउनुपर्ने बताए। उनका अनुसार यो दिनले पत्रकारलाई आफ्नो पेशागत आचारसंहिता पालनासँगै जनताको अधिकार र आवाजलाई सशक्त बनाउन प्रेरणा दिनेछ। उनले भने, “सञ्चारकर्मीले लोकतान्त्रिक मूल्यको सुरक्षा गर्ने पहिलो पंक्तिमा उभिनुपर्छ। संविधान दिवस हाम्रो भूमिकाको पुनः स्मरण गर्ने महत्त्वपूर्ण अवसर हो।”
कार्यक्रममा प्रेस काउन्सिल नेपालका पूर्व सदस्य गणेश पोखरेल, मानव अधिकारकर्मी कोषराज न्यौपाने, सोम थापा, महासङ्घ झापा शाखाका अध्यक्ष एकराज गिरीलगायतले पनि संवैधानिक मूल्यलाई जीवन्त राख्ने जिम्मेवारी सबैको साझा भएको उल्लेख गरे।
महासङ्घ झापा शाखाका सचिव राजु पाठकका अनुसार, प्रभात फेरी र कोणसभामा सहभागी विभिन्न संघसंस्थाले संविधान दिवसलाई औपचारिक भन्दा पनि व्यवहारिक बनाउन आग्रह गरेका थिए। उनका अनुसार सहभागीहरूले संविधान दिवसलाई मानव अधिकार, पत्रकारिता र लोकतन्त्रसँग प्रत्यक्ष जोडेर मनाउनु समयको माग हो भन्ने निष्कर्ष निकाले।
कोणसभामा वक्ताहरूले हालको राजनीतिक परिदृश्यमा मानव अधिकार संरक्षण र पत्रकारिताको स्वतन्त्रतामाथि देखिएका चुनौतीप्रति चिन्ता व्यक्त गरे। उनीहरूले राज्य, राजनीतिक दल र नागरिक समाज सबै मिलेर लोकतान्त्रिक प्रणालीलाई सबल बनाउनुपर्नेमा जोड दिए।
संविधान दिवसको अवसरमा सञ्चारकर्मीहरूले देखाएको सक्रियता र अग्रसरतालाई सहभागीहरूले सकारात्मक कदमका रूपमा लिएका थिए। कार्यक्रमले संविधान दिवसलाई केवल राष्ट्रिय पर्वको रुपमा मात्र नभई लोकतान्त्रिक मूल्य र मानव अधिकार सुदृढ गर्ने अभियानको दिनका रूपमा मनाउन प्रेरणा दिएको छ।
यसरी संविधान दिवसमा झापाका सञ्चारकर्मीले गरेको प्रभात फेरीले लोकतन्त्र, स्वतन्त्र प्रेस र मानव अधिकारमा बलियो प्रतिबद्धता प्रकट गरेको छ। उनीहरूको संदेश स्पष्ट छ – संविधानको संरक्षण र अभ्यासमा सञ्चारकर्मी सधैँ अगाडि रहनेछन्,।
