प्रहरि कल्याणकारी कोषको १७ अर्ब भन्दा बढी रकममध्ये झण्डै १३ अर्ब रुपैयाँ रकम हिनामिना भएको भन्दै नेपाल पूर्व प्रहरी संगठनले देशका ७७ वटै जिल्लाका जिल्ला प्रहरी कार्यालयहरुलाई ज्ञापन पत्र दिएको छ ।
केन्द्रीय निर्देशन बमोजिम संगठन झापाले पनि जिल्ला प्रहरी कार्यालय झापालाई बिहीबार कार्यालयमै पुगेर ज्ञापन पत्र बुझाएको हो । केन्द्रीय सदस्य मदन गोपाल सुब्बा र झापा अध्यक्ष खड्गबहादुर खड्काको नेतृत्वमा जिल्ला भरिका पूर्व प्रहरी संगठन सदस्यको एक टोलीले इन्सपेक्टर एशोधा घलेलाई ज्ञापन पत्र बुझाएको हो ।
ज्ञापन पत्रमा २०४९ देखि २०६९ भदौ सम्मको कल्याण कोषको आय–व्याय हिसाब–किताब संगठन पदाधिकारिको रोहबरमा छानविन समिति गठन गर्नुपर्ने, कल्याणकारी कोषको रकम ४०% वहालवाला प्रहरीको लागि, ४०% रकम पूर्व प्रहरीका लागि र २०% रकम आयमूलक कार्यमा खर्च गर्नुपर्ने लगायतका विभिन्न ६ बुँदे मागहरु उल्लेख गरिएका छन् ।
विगत ३० वर्षदेखि अहिलेसम्म १७ अर्ब भन्दा माथि कोषमा रकम रहनु पर्नेमा केवल ४ अर्ब मात्र रहेको र बाँकी रकम हिनामिना भएको पूर्व प्रहरी संगठनको ज्ञापन पत्रमा उल्लेख छ । माग पूरा नगरी आलटाल गरेमा आन्दोलनसहित न्यायिक निकायसम्म जाने संगठनले जनाएको छ ।
