कोशी प्रदेशमा पहिलोपटक बिर्तामोडमा एक महिने जुत्ता चप्पल महोत्सव शुरु भएको छ । ‘स्वदेशी उत्पादन प्रवद्र्धन हाम्रो अभियान’ भन्ने मुल नाराका साथ महोत्सव सुरु भएको हो ।

कोशी प्रदेशस्तरीय ‘प्रथम बिर्तामोड जुत्ता चप्पल व्यापार महोत्सव २०८०’ माघ ९ गतेसम्म चल्नेछ । बिर्तामोड सिटी सेन्टर इन्भेष्टमेन्ट प्रालिको आयोजना तथा नेपाली जुत्ता उद्योगी समूहसँगको सहकार्यमा महोत्सवको आयोजना गरिएको हो ।

महोत्सवमा नेपालका आठ वटा कम्पनीले उत्पादन गरेका १५ भन्दाबढी ब्राण्डका जुत्ता चप्पल राखिएको छ । महोत्सवमा नेपालमा स्थापित चर्चित जुत्ता चप्पल उत्पादक कम्पनी र ब्राण्डहरु उपलब्ध छन् ।

रोयल फुटवेयर इण्डष्ट्रिज प्रालिको रोयल शुज, वेश फुटवेयर इन्डष्ट्रिज प्रालिको उत्पादन बीएफ डियर हील शुज, लालीगुराँस फुटवेयर इन्डष्ट्रिज प्रालिको क्रशरोड शुज, शुभकामना फुटवेयरको फस्टवाक शुज, स्मार्ट शुज इन्डष्ट्रिज प्रालिको स्मार्ट शुज, डी. जे. शुज कम्पनीको डीजे शुज, एक्सन फुटवेयर कम्पनीको टुरिस्ट शुज र रन शुज इन्डष्ट्रिज प्रालिको रन शुज गरी आठवटा कम्पनीको १५ भन्दाबढी ब्राण्डको सहभागिता रहेको छ ।

मेलामा तीन हजारभन्दा बढी मोडल र डिजाइनका जुत्ता चप्पलहरु उपलब्ध छन् । उद्योग वाणिज्य महासंघका केन्द्रीय सदस्य, फुटवेयर म्यानुफ्याक्चर्स एशोसिएसन अफ नेपालका अध्यक्ष तथा महोत्सवका संयोजक नानीराज घिमिरेको अध्यक्षतामा भएको महोत्सवलाई बिर्तामोड नगरपालिकाका उपप्रमुख नगेन्द्रप्रसाद संग्रौलाले उद्घाटन गरेका छन् ।

प्रमुख अतिथि संग्रौलाले स्वदेशी उत्पादनलाई टेवा पुर्याउन स्वदेशी कम्पनीहरुले मिलेर सञ्चालन गरेको महोत्सवलाई सबैले सहयोग गर्नुपर्नेमा जोड दिए । उनले व्यापार खस्किदै गएको सिटी सेन्टरमा महोत्सवको सञ्चालनले मार्केटको प्रवद्र्धनमा सहयोग पुग्ने विश्वास व्यक्त गरे ।

स्वदेशमा उत्पादित जुत्ता चप्पल र स्वदेशी ब्राण्डहरुलाई उपभोक्ताहरुको माझमा पुर्याउने र आम उपभोक्ताहरुलाई स्वदेशी वस्तु नै प्रयोग गर्ने भावनाको विकास गराई स्वदेशी उत्पादन प्रयोगका निमित्त उपभोक्ताहरुको रुची जगाउने उद्देश्यका साथ देशका प्रमुख शहरहरुमा विभिन्न खालका मेला महोत्सवहरु आयोजना गर्दै आइरहेको कार्यक्रमका अध्यक्ष घिमिरेले जानकारी दिए ।

कार्यक्रममा बिर्तामोड उद्योग वाणिज्य संघका वरिष्ठ उपाध्यक्ष राजु न्यौपानेले पनि शुभकामना मन्तव्य राखेका थिए । कार्यक्रमको सञ्चालन सिटी सेन्टरका सञ्चालक उमेश राउतले गरेका थिए ।

महोत्सवमा नयाँ डिजाइनका आकर्षक जुत्ता चप्पल खरिदमा २० देखि ५० प्रतिशतसम्म छुटको ब्यवस्था रहेको, महोत्सव बिहान ९ बजेदेखि बेलुका ७ बजेसम्म खुल्ला रहने फुटवेयर म्यानुफ्याक्चर्स एशोसिएसन अफ नेपालका उपाध्यक्ष तथा रन शुज इन्डष्ट्रिजका प्रवन्ध निर्देशक रुद्र न्यौपानेले बताए ।

महोत्सवमा एक महिना अवधिभर ३ लाख अवलोकनकर्ताको सहभागिता रहने र करिव ३ करोडको कारोवार गर्ने लक्ष्य राखिएको फुटवेयर म्यानुफ्याक्चर्स एशोसिएसन अफ नेपालका पूर्व अध्यक्ष होमनाथ उपाध्यायले बताए । उनले महोत्सव सम्पन्न भइसकेपछि सिटी सेन्टरमा सबै कम्पनीहरुले संयुक्त रुपमा शोरुम राख्ने जानकारी दिए ।

महोत्सवको पहिलो दिन ग्राहकहरुको भीड लागेको थियो । महोत्सवप्रति उपभोक्ताहरुको चासो देखिएको र आफ्ना कम्पनीको सामान राम्रै बिक्री भइरहेको स्मार्ट शुज इन्डष्ट्रिज प्रालिका संचालक जीवनकुमार श्रेष्ठले जानकारी दिए ।